बलेफी गाउँपालिका–५ को आयोजनामा शुक्रबार बलेफी माध्यमिक विद्यालयमा वडा–स्तरीय निबन्ध लेखन तथा माइन्युट लेखन खुला प्रतियोगिता सम्पन्न भएको छ। पालिका अध्यक्ष गंगा बहादुर तामाङको प्रमुख आतिथ्यततामा वडाभित्र रहेका विद्यार्थीहरूको सिर्जनशीलता र लेखन सीप विकास गर्ने उद्देश्यसहित गरिएको उक्त कार्यक्रममा कक्षा ५ देखि १२ सम्मका विद्यार्थीहरूको उत्साहपूर्ण सहभागिता रहेको वडाअध्यक्ष यादब ठकुरीले जानकारी दिनु भयो ।
कक्षा ५ देखि ८ मा अध्ययनरत विद्यार्थीहरूबीच “बालमैत्री शिक्षा आजको आवश्यकता” शीर्षकमा निबन्ध लेखन प्रतियोगिता सञ्चालन गरिएको थियो। सहभागी विद्यार्थीहरूले आफ्नो दृष्टिकोण, अनुभव र आजको शैक्षिक वातावरणमा बालमैत्री शिक्षाको महत्त्वलाई प्रभावकारी रूपमा अभिव्यक्त गरेका थिए।
माइनेट उठाउने विधामा कक्षा ९ देखि १२ का १५ जना विद्यार्थी सहभागी भएका थिए । प्रतियोगितामा प्रथम स्थान शिशिर पौडेलले हासिल गर्दा द्वितीय स्थान देवीसा पौडेलले, तृतीय स्थान आस्था रोक्काले र सलिना श्रेष्ठलाई सान्त्वना स्थानहाँसिल गरेको छ ।
यस्तै, कक्षा ६ देखि ८ सम्मका १७ विद्यार्थी सहभागी निबन्ध लेखन प्रतियोगिता “बालमैत्री शिक्षाः आजको आवश्यकता” शीर्षकमा सम्पन्न भएको थियो । शुप्रिया भुजेल प्रथम, ब्रिटिसा तामाङ द्वितीय, उष्णवी तामाङले तृतिय र रेश्मा कार्कीले सान्त्वना स्थान हासिल गरेको विद्यालयले जनाएको छ ।
दुवै विधामा प्रथमलाई ३०००, द्वितीयलाई २१००, तृतीयलाई १०५० तथा सान्त्वना विजेतालाई ५५० नगद सहित प्रमाणपत्र वितरण गरिएको थियो । उनिहरुलाई गाउँपालिका अध्यक्ष गंगाबहादुर तामाङ, सभापति वडा अध्यक्ष यादव ठकुरी लगायतले पुरस्कार बितरण गरेका थिए । कार्यक्रम कक्षा १० की वर्षा भुजेलले सञ्चालन गरेकी थिइन्।
वडाध्यक्ष यादव ठकुरीका अनुसार प्रतियोगिताले विद्यार्थीहरूमा विश्लेषण क्षमता, लेखन कौशल तथा सामाजिक विषयप्रतिको समझ बढाउन महत्वपूर्ण भूमिका खेलेको छ। उनले यस्ता कार्यक्रमले विद्यार्थीहरूलाई नेतृत्व, अभिव्यक्ति क्षमता र प्रतिस्पर्धात्मक भावना विकास गर्न मद्दत गर्ने भएकाले वडाले आगामी दिनमा पनि निरन्तरता दिने बताएका छन्।
प्रतियोगितामा स्थानीय शिक्षक, अभिभावक तथा सरोकारवालाको उल्लेखनीय उपस्थिति रहेको थियो। आयोजकले उत्कृष्ट छात्रछात्रालाई पुरस्कार वितरण समेत गरिएको थियो ।
